Япон Улс гадаадын бизнес эрхлэгчдийн оршин суух зөвшөөрлийн шаардлагыг өндөрсгөнө

Япон Улсын Цагаачлалын алба Японд бизнесийн үйл ажиллагаа эрхэлж буй гадаадын иргэдийн оршин суух зөвшөөрлийн шалгуурт өөрчлөлт оруулах санал боловсруулжээ. Уг саналыг 8 сарын 25-нд Парламентын Либерал ардчилсан намын бүлгийн тусгай хороонд танилцуулсан байна.

Одоогийн журмаар бизнес эрхлэхийг хүсэгчдээс 5 сая иен (ойролцоогоор 34,000 ам.доллар)-ийн хөрөнгө шаардаж байгаа бол шинэ өөрчлөлтөөр энэ босгыг 200,000 ам.доллар болгон нэмэгдүүлэхээр тусгажээ. Мөн гадаадын бизнес эрхлэгч нь 3 ба түүнээс дээш жилийн бизнесийн болон менежментийн туршлагатай эсвэл магистрын зэрэгтэй байх, Японд бүтэн цагаар нэг ажилтан ажиллуулж байх шаардлагыг тавих ажээ.

“Бизнесийн удирдлага” ангиллын оршин суух зөвшөөрөл эзэмшигч гадаадын иргэдийн тоо сүүлийн жилүүдэд эрс өссөн бөгөөд 2024 оны эхний хагас жилийн  байдлаар 41,000 гаруй хүн уг зөвшөөрлөөр Японд ажиллаж амьдарч байгаа нь 10 жилийн өмнөхөөс хоёр дахин нэмэгдсэн үзүүлэлт юм. Харин хялбар нөхцлийн улмаас хуурамч компанийн нэр ашиглан оршин суух зөвшөөрөл авах зөрчил гарч буй нь шалгуур чангатгах гол шалтгаан болжээ.

Цагаачлалын алба өөрчлөлтийн талаар олон нийтээс санал авч, энэ оны сүүлээр эцэслэн батлахаар төлөвлөж байна.